Бировларни муҳокама қилишни яхши кўрамиз. Чунки ўзганинг айби, хатолари яққол кўзимизга кўринади. Лекин ўзимизга келганда, кузатувчанлигимиз панд бериб қолади ёки айбларимизни тан олмаймиз, ҳатто мен мукаммал бўлсам керак, деган фикрлар ҳам миямиздан ўтади. Аслида қандай инсон эканимизни қандай англасак бўлади?
Бировларнинг гапини ҳадеб кўнглингга яқин олаверма, дейишади. Бу маслаҳат тўғри, лекин атрофдагиларнинг сизни қай даражада қабул қилишига қараб феъл-атворимизни билиб олишимиз мумкин. Агар хаёлингиздан шу савол ўтиб турса, бу албатта яхши белги. Сабаби ўта худбин инсонларни бу мулоҳаза умуман қизиқтирмайди. Улар охирги дамгача муаммо менда эмас, деган тушунча билан яшайди.
Демак, ўз устингизда ишлашга рози бўлсангиз, қуйидаги фикрларга қулоқ тутинг:
– Сизни хавотир қийнайди, омма олдида обрўсизланишдан қўрқасиз, одамларни танқид қилиш орқали, уларни бошқаришга ҳаракат қиласиз.
– Дўстларингиз ютуғини гапирганда, хурсанд бўлишнинг ўрнига воқеанинг салбий томонини излайсиз.
– Кимнидир тўғри йўлга солишга уринасиз, насиҳат беришдан чарчамайсиз.
– Дўстларингиз кўп эмас.
– Сизга керак бўлгандагина бировга меҳр кўрсатасиз.
– Сўнгги бир йил ичида бирон марта ноҳақ эканингизни тан олмадингиз.
– Ўзингизга берадиган баҳоингиз икки хил бўлиши мумкин. Ўзингизни бировлардан устун қўясиз ёки бошқалардан паст кўрасиз.
– Кўп одамлар билан иноқмассиз, лекин керак пайтда уларни мафтун қила оласиз.
– Одамлар сиздан четроқ юради.
– Ҳамма жойда душман топасиз.
Яна иккита саволимизга жавоб беришга ҳаракат қилинг. Бировнинг ҳаётига негатив уруғини сепиб туриб, лекин муносабатларингизни узишни истамайсиз, шундай эмасми? Ўзгани хафа қилсангизда, кечирим сўрамайсиз ва дилозорлик қилишда давом этасизми?
Агар жавобларингиз тасдиқ маъносида бўлса, демак айбингизни тан олдингиз. Бу эса ўзгариш истаги сари илк қадам. Ўзингизга кўзгу тутиб, аслиятингизни билиб олдингиз.
Аслида қалб оғриғи сизни қийнайди ва бу атрофдагилар билан муносабатларга таъсир ўтказади. Сизга маслаҳатимиз эшитишни ўрганинг. Танқид қилишса, фақат ўзингизни оқлайвермасдан, ҳаракатларингизни тарозига солиб кўринг.
Ҳаммаси бирданига яхшиланиб қолмайди. Токи бутунлай ўзгармагунингизча, сиз қаттиқ хафа қилаётган инсонларингиздан четроқда юринг. Ойлар ва ҳатто йиллар давомида ички ҳисларингизга қарши курашишга тўғри келар.
Сиз бировларни атайлаб хафа қилмагансиз, балки ҳимоя тизимингиз шундай ишлайди. Бу албатта, салбий қадамларингизни оқламайди, балки уларга фақат тушунтириш беради холос. Демак, қалбингизни даволаса бўлади. Ўтмишингиз сизни бошқаришига йўл қўйманг. Ўзгаларни тўғрилашнинг ўрнига, ўзингиз устингизда ишланг. Бахт ҳиссини туйсангиз, меҳрибонлигингиз ортади. Олдинда ёруғ нур бор ва уни кўра олишингиз керак.
#SukutSaqlama #СукутСақлама #Фикр #Аёллар
