Лойиҳамиз муаллифига бир аёл қўнғироқ қилди. Унинг розилиги билан ҳикоясини сизга ҳавола этмоқдамиз. Қаҳрамонимиз тўрт фарзанднинг онаси Соҳиба опа (шартли равишда қаҳрамонларнинг исмлари ўзгартирилди) умрининг ўн тўққиз йилини ижарама-ижара юриб, фарзандларини ҳалол боқиб, катта қилди. Қизлар катта бўлиб, уйидан совчилар аримай қолди. Катта қизини узатганлиги учун навбат иккинчи қизига келган эди. Шаҳнозани ҳам узатиш вақти келиб, ўзларига маъқул бўлган Рустамга 2021 йилнинг апрель ойида узатди. Соҳиба опани ҳайрон қолдирган нарса тўйнинг маслаҳатсиз ва ғалати ташкил этилганида бўлди. Энг қизиғи, бўлғуси куёв, қизи Шаҳнозага тўй куни қора рангли кўйлак кийишини айтган, аммо Соҳиба опа оёқ тираб оқ кўйлак кийдирган.
Тўй куни Соҳиба опа қаттиқ адашганини тушуниб етган бўлса-да, ғишт қолипдан кўчганлиги учун лабини тишлаб қолаверган. Тўйдан кейин Шаҳнозани ҳар икки ҳафтада бир марта Соҳиба опаникига олиб келарди, унда ҳам кеч соат 20:00 да олиб келиб, тун соат 1:00, ҳатто ундан ҳам кеч олиб кетарди. Соҳиба опани кичкинтойи Ниҳол 3 ёшда. Барча ташвишлар 2021 йилнинг 28 августь куни тун соат 3:00 да қизлари Шаҳноза ва Ниҳоллар жон холатда йиғлаб кириб келишганида бошланди.
Соҳиба опа ҳавотирланиб нима бўлганини сўрагач, Шаҳноза йиғлаб бор гапни айтиб берган. Шаҳнозанинг гапларига кўра: эри Рустам олдин уйланган ва тўрт нафар боласи борлигини кейин билади, ундан ҳам ёмони Шаҳноза Рустамга турмушга чиққан кундан бошлаб, Рустам унга жинсий зўрлик ишлатади. Тўйдан олдин Рустам: “Хайз кунинг қачон”? – деб сўрайди, Шаҳноза кунини айтгач, атайлаб тўй кунини Шаҳнозанинг хайз кунига тўғирлаб белгилайди. Тўй оқшомида, ҳеч кимга айтмай Шаҳнозани мехмонлар орасидан олиб чиқиб кетади, Соҳиба опа ҳавотирда ўтирган бир пайтда қизи қўнғироқ қилиб, ҳаммаси жойида эканлиги, улар “Тўй саёхати”га кетганлигини айтгач, Соҳиба опа уйига кетади.
Шундай қилиб тўй оқшоми куни Рустам хотини Шахнозага бирга бўлишни хоҳлаётганини айтади, лекин Шаҳноза хайз кўраётгани учун буни иложи йўқлигини айтади. Рустам эса жинсий яқинликнинг бошқа йўллари ҳам борлигини айтиб, Шахнозага зўрлик билан “Орал”, яъни оғзига жинсий яқинлик қилади, бу ҳолат тўрт ой давом этади. 2021 йилнинг август ойида Соҳиба опа Covid бўлиб қолгани учун куёвига, кичкинтой Ниҳолни уйига олиб кетишини сўраб илтимос қилади. Куёви Ниҳолни кеч соат 17:00да олиб кетади, аммо 00:00 дан ўтиб уйига кириб боради. 2021 йил 21 август куни Ниҳолни 11-синфда ўқийдиган ўғлига айтиб олиб келтиради. Қизалоқни кўриб Соҳиба опанинг юраги орқасига тортиб кетади. Қизалоқни юзлари қаттиқ тишланганидан кўкариб кетган эди, шунда ҳам қизи ёки куёвига қўнғироқ қилиб нима бўлганини сўрамайди.
2021 йилнинг 27 август куни куёви Рустам келиб кичик қизи Нихолни сўраган, Соҳиба опа кўнмаган, кейин қизи Шахноза кириб қайнона ва қайнотаси кетаётгани учун ёлғиз қолаётгани, шунга синглиси у билан яшаб туришига рухсат сўрагач, Соҳиба опа иложсиз ўн кунга кичик қизи Ниҳолни улар билан юборади. Шу ўн кун давомида бечора 3 ёшли қизалоқни Рустам қийнаб, тишлаб, буғиб, унинг юзларига эркаклик олатини кўрсатиб, Ниҳолнинг бақирганига, йиғлаганига роҳатланиб юрган. Буни кўрган Шаҳноза дод солиб синглисини қўйиб юборишини сўрайди. Унинг бу гапларига эри: “Сен бундай бақирмайсан, менга бунақа роҳат бермайсан”, дейди. Синглисини қутқаришга харакат қилган Шахнозни итариб, ётоқхонага кириб эшикни ичидан қулфлаб, ўзининг хатто ит хам қилмайдиган қабих ишларини давом эттиради. Рустам хуморидан чиққунча, қизалоқни хўрлайди, тун ярмида Рустам ухлаб қолгач, Шахноза аста синглисини олиб уйдан қочиб кетади.
28 август куни Соҳиба опа “Тез ёрдам”га қўнғироқ қилади ва улар ўз навбатида “02” га мурожаат қилишади. Соҳиба опа бор ҳолатни қисман тушунтириб бергач, Соҳиба опани куёви яшайдиган маҳалла фуқаролик йиғинига чақиртиришади, у ерда маҳалла нозири Соҳиба опанинг гапларини менсимасдан: “Буни исботлаб беролмайсиз, керак бўлса туҳмат қилаётганингиз учун куёвингиз устингиздан ёзса ўн беш миллион сўм жарима тўлайсиз”, дейди. Унинг бу гапларини эшитган Соҳиба опа “02”га қўнғироқ қилиб, махалла нозирининг дўқ қилганини айтади, унинг устидан ариза ёзиш кераклигини айтишади. Соҳиба опа кейинги сафар куёвининг маҳалласига борганида негадир маҳалла нозирини кўрмайди. Маҳалла раиси, куёвининг қўшнилари билан гаплашади, куёвининг нақадар хавфли шахс эканини айтиб огоҳлантиради.
Энг қизиғи, Соҳиба опа куёвини Чилонзор туманидаги ўқув марказларининг бирида ҳеч қандай педагогик-психологик дипломига эга бўлмаса-да, ёрдамчи психолог бўлиб ишлаётганини билиб қолади. Ўқув маркази раҳбарига қўнғироқ қилиб, куёвининг қанақа инсон эканлигини айтиб, қизларининг расмлари ва овозли аудио ёзувларини юборса-да, марказ рахбари қуруққина “раҳмат” деб қўя қолади. Яъни бирорта чора кўрилмайди.
Ҳатто ҳозирги кунда хам Рустам Шахнозани қўрқитиб “Қўлидан хеч нарса кемаслиги, у биринчиси ҳам, охиргиси ҳам эмаслигини” айтиб устидан кулиб келмоқда. Кичик қизалоқ Ниҳол кучли рухий ҳолатга тушиб қолган. Психологларнинг шуғулланишлари фойда бермаяпти, одамови бўлиб қолган. Уйда ҳам фақат стол остига кириб беркинади. Қизалоғи овуниши учун кичкинагина мушукча олиб келиб берган Соҳиба опа қизининг ҳолатидан қўрқиб кетади.
Ниҳол мушукчани бўйнидан буғиб, уни бошларига ураётганини кўриб қолади. Хар мушукни урганида Ниҳол хурсанд бўлиб кулаётганини йиғлаб тасвирлаб берди.
Ҳурматли ўқувчи, ушбу воқеани ўқиб ҳайратда қолдингизми? Бизнинг аҳволимизни тасаввур қилаверинг. Ўзбекистонда аёллар ҳуқуқлари ҳимояланган дейишади-ю, нега Рустамга ўхшаганларга жазо қўлланилмайди? Нега бу каби разиллар очиқда юриш керак? Эр хотинига нисбатан унинг хоҳишига қарши ғайриоддий усулда жинсий алоқа қилса, зўравонлик деб ҳисобланмайди. Нега? Эри томонидан муттасил калтакланиб, зўрлаб келинган аёлларимизнинг яна қанчаси қурбон бўлиши керак? Энди қизалоққа келсак… унинг руҳияти тикланармикан? Бир умр рухий ногирон бўлиб қолмайдими? Унга қонун ва қонун ҳимоячиларимиз нега жим? Агар ўша қизалоқнинг отаси бўлганингизда, ҳурматли қонун ҳимоячилари, қизлиги олиб қўйилмаган-ку деб индамай ўтираверасизми?
