Ўғил болалар болаликданоқ “нозик” ҳиссиётлардан йироқда тарбияланади. Уларга ҳисларингни билдириш уят, деб ўргатишади. Натижада бундан нафақат аёллар, балки эркакларнинг ўзлари ҳам азият чекади. Бунинг олдини олиш учун нима қилиш керак?
Аёллар табиатан эркакларга қараганда ҳиссиётга берилувчан бўлади ва ҳисларини очиқчасига билдиришга ўрганган. Эркаклар эса меҳрини амалда кўрсатишни ҳуш кўради. Улардан “ўлдим-куйдим” деган изҳорларни эшитиш қийин. Бугун жуфтингиз сизга рўзғорда ёрдам бердими, демак билингки, бу орқали у сизга бўлган эътибори ва меҳрини ифода этяпти.
Бирданига саёҳатга олиб бормоқчи, чиройли либос олиб берди, сизга табассум қиляпти, фарзандларига яхши муомалада бўляпти. Эркакнинг ушбу ҳаракатлари негизида сизга бўлган улкан муҳаббат мужассам. Лекин биз аёллар барибир қулоқларимиз билан яхши кўришга ўрганганмиз. Бизга мудом чиройли сўз керак. Эркак эса чиройли сўзларни изҳор қилишни унчалик билмайди. Тан олиш керак, эркакларимиз орасида сўзамол, аёлнинг кўнглини ширин каломлари билан эритиб юборадиганлар ҳам бор. Биринчидан, бундайлар кам. Иккинчидан, бу каби изҳорлар замирида доим ҳам ҳақиқат бўлавермайди.
Сир бой бергиси келмайди
Ҳеч сезганмисиз, баъзи аёллар “эрим сир бой бергиси келмайди, сирларини умуман менга айтмайди” деб нолиб қолади. Бундан хафа бўлиш керакми ёки хурсанд? Баъзи эркаклар бу ҳаракати билан аёлини авайлаб асрайди. Ортиқча ташвишнинг нима кераги бор. Рўзғор, уй юмушлари, оила ташвиши аёлга етиб ортади. Ортиқча қизиқувчанлик билан ҳаётингизни мураккаблаштириб нима қиласиз. Айтмаса айтмабди-да, осмон узилиб ерга тушармиди?! Кун келиб, ҳали барча сирларини айтади ҳам, энг яқин сирдошига айланасиз. Фақат сабр қилинг!
Андиша қилади
Азал-азалдан уйланган эркак аёлига ҳамманинг олдида ёки очиқчасига ҳушомад қила олмаган. Баъзилар ҳатто рафиқасини ота-онасининг олдида кўпроқ уришиб яшаган. Ич-ичидан севса-да, буни очиқ кўрсатишга андиша қилган. Ушбу одат бугунгача сақланиб келмоқда. Балки бироз юмшаган бўлсада, лекин барибир сезилиб туради. Агар ушбу ҳақиқатни яхши англасангиз, турмуш ўртоғингизни секин-асталик билан ўргатиб боришингиз мумкин. Аёл оилада нима хоҳлашини айтиб яшаши керак. Чунки эркаклар тахмин қилишни ёмон кўради. Улар кўзи билан кўриб турган нарсага ишонади. Шундай экан, ичингиздагини қаердан билсин.
Лекин барибир аёллигимизга борамизда. Севимли инсонимиздан яхши сўз эшитишни хоҳлаймиз.
ЭРКАККА ИЖОДКОРЛИКНИ ЎРГАТИШНИНГ 5 ҚОИДАСИ
- Эркакми у ёки аёл, иккиси ҳам бирдек ҳисларни қалбидан кечиради. Дард, алам, асабийлик, ғазаб, ҳайрат, нафрат. Турмуш ўртоғингизга бу туйғуларни очиқчасига билдириш ёмон эмаслигини тушунтиринг.
- Икки инсон ўртасида ҳиссий боғлиқлик нақадар аҳамиятли эканлигини айтинг. Айниқса, сиз учун бу жуда муҳим эканлигини билдириб ўтинг.
- Таассуротлари ва ички ҳисларини бемалол билдириши мумкинлигини тушунтиринг. “Бунинг учун сизни айбламайман ёки нотўғри қабул қилмайман”, денг.
- Аёлига ён босиш ёки истагига қулоқ солиш эркаклик шаънини тушириб юбормайди. Аксинча эркакни аёлининг олдида яна бир поғона юксалтиради. Бу фикрни ҳам бирга муҳокама қилишингиз мумкин.
