Уйқусизлик муаммоси кўпчиликка таниш бўлса керак. Бугун ушбу муаммонинг келиб чиқиши ва уни енгиш чораларини излаб кўрамиз.

Уйқусизлик ҳар қандай ҳолат сингари ўз-ўзидан пайдо бўлиб қолмайди. Уйқу билан боғлиқ муаммоларнинг турли сабаблари бор: стресс ва чарчоқ, депрессия ва неврологик касалликлар, кучли ҳаяжон, кун тартиби ва дам олишнинг бузилиши, соматик хасталиклар ва оғриқ. Агар бир ойда камида икки марта уйқу бузилса, зудлик билан шифокорга мурожаат қилиш зарур.

Баъзи бир одамлар шифокорга боришни исташмайди ва уйқусизликка қарши мустақил курашмоқчи бўлади. Натижада дорилар ичилади, афсуски бундай препаратлар сабабни йўқотмайди, фақатгина вақтинчалик чора ҳисобланади. Дорилар тугагандан кейин организм яна олдинги ҳунарини бошлайди.

Нима қилмоқ керак?

Биринчидан, кун тартибини таҳлил қилиш лозим. Мириқиб ухлаш учун инсон кун давомида фаол бўлиши лозим, яъни куннинг 2/3 қисмида ишлаб, 1/3 қисмида дам олиш зарур. Ақлий меҳнатнинг ўзи етарли эмас, жисмоний фаоллик ҳам албатта бўлиши лозим. Уйқусизликдан азият чекувчи инсонларга кечга яқин, уйқудан камида 4 соат аввал қуйидаги машқларни бажариш тавсия этилади.  

1) Жисмоний юкламалар

Бунга спорт ёки гимнастика билан шуғулланиш, тоза ҳавода сайр қилиш (1-2 соат) киради.

1-машқ 

Қоринни пастга қилиб ётиб олинг. Бош пастга қараб жойлашади, қўллар икки томонга чўзилган. Нафас олиб чиқарганда қўлларни ҳар томонга ҳаракатлантиринг. Ҳар бир аъзо текис жойлашиши керак. 

Ушбу машқни 10-15 марта такрорланг. 

2-машқ 

Тепага қараб ётган ҳолда оёқларни икки ёнга кетма-кет букинг. Аввал ўнг томонга, кейин чапга. Бунда танангиз текис туришига аҳамият беринг. Тўғри нафас олишни унутманг. 

Машқни 10-15 марта бажаринг.

3-машқ 

Тепага қараб ётинг ва бир оёғингизни иккинчи оёғингиз тиззаси устига қўйинг. Оёқларингиз бир-бирига яқин жойлашсин. Бу ҳолатни 5-10 сония ушлаб туринг, сўнг дам олинг.

Машқни 10-15 марта қайтаринг.

4-машқ 

Бир оёқни букинг ва қорнингизга қўлларингиз ёрдамида теккизинг. 10-15 сония ушлаб туринг. Сўнг иккинчи оёқни худди шундай ҳаракатлантиринг.

10-15 марта бажаринг.  

5-машқ 

Бу машқ ерга ўтирган ҳолатда бажарилади. Оёқлар бирлаштирилиб, тиззалар икки томонга букилади. Қўллар билан тиззаларни ушлаб, бошни олд томонга чўзамиз. Бу машқ бел мушакларини чўзади ва уларга эгилувчанлик бағишлайди. 

10-15 марта такрорланади. 

2) Бўшаштирувчи муолажалар.  

Асалли ёки ромашкали чой ухлашга ёрдам беради. 15-20 дақиқа давомида илиқ ванна қабул қилиш, тузли ванналар ҳам тавсия этилади. Бундан ташқари, оёқ кафтини массаж қилиш ёрдам беради. Чунки оёқ устида 7 мингта асаб толалари бор. Уларга таъсир қилиш орқали бутун организмни соғломлаштирамиз. Массаж бармоқлардан бошлаб товонга қараб давом эттирилади. Айланма ҳаракатлар қилиш мумкин. Бундай массажни 5-7 марта такрорлаган ҳолда, 10-30 кун давомида бажарса бўлади.  

Унутманг, уйқу асаб тизимининг муҳим воситаси ва у бутун организмга таъсир ўтказади. Шунинг учун унга эътиборли бўлинг.

Манба: https://beautyhack.ru