Инсон соғлом бўлса, ўзини бахтли ҳис этади. Саломатлик эса фақатгина жисмоний ёки руҳий фаровонликни назарда тутмайди, балки жамиятда ўзаро муносабатларни йўлга қўйиш, инсонлар билан ҳамжиҳатликда яшашни билдиради. Бунга эришиш учун нималарга эътибор бериш кераклиги ҳақида бир неча тавсияларни бериб ўтамиз.
Ижтимоий саломатлик нима?
Бу бошқа инсонлар билан самимий муносабат ўрнатишдир. Мазкур соҳадаги муваффақият бизнинг атрофимиздаги ижтимоий воқеликларга қанчалик мослашишимизга боғлиқ.
Ижтимоий саломатликнинг белгиларига қуйидагилар киради:
Ижтимоий ва шахсий вақт бобида меъёрни таъминлаш;
жамиятда инсонлар билан мулоқот қилиш;
оилада ва дўстлар билан мустаҳкам алоқа ўрнатиш;
турли ижтимоий вазиятларга тез мослашиш;
вазиятдан қатъи назар ўзликни сақлаб қолиш;
ўзга инсонларни ҳурмат қилиш;
шахсий чегараларни қатъий белгилаб олиш;
ҳаётдан мамнун бўлиш.
ИЖТИМОИЙ САЛОМАТЛИКНИ МУСТАҲКАМЛАШ СИРЛАРИ
1. Ҳар ҳафта камида беш нафар одам билан мулоқот қилинг
Шунда ўзимизни бахтлироқ ҳис этамиз. Қариндошлар бўладими, қўшниларми ёки танишлар, ҳамкасблар, энг муҳими, бу мулоқот сиз учун аҳамиятли бўлсин. Уларга қўнғироқ қилинг, интернет орқали ёзинг, меҳмонга боринг, кўчада учрашинг, бирга овқатланинг.
2. Қўшнилар билан иноқ бўлинг
Инсонлар билан тил топишишнинг синалган усули меҳрибонлик кўрсатиш. Олимлар эса атрофдагиларга, айниқса, қўшниларга яхшилик қилишни маслаҳат беришади. Шунда одам ўзини ёлғиз ҳис этмайди.
3. Телефонда кўпроқ гаплашинг
Бизни жонли мулоқотдан айирган смартфонлар ҳақида қанчалик ёмон гапирмайлик, уларнинг фойдали томонлари ҳам бор. Улар ҳам ёлғизликни енгишга ёрдам бера олади. Ярим соат ёки бир соатлаб гаплашиш шарт эмас, соғинган инсонингиз билан 15 дақиқа гаплашсангиз ҳам кўнглингиз тўлади.
4. Ҳеч бўлмаса, уч нафар инсон билан яқиндан дўстлашинг
Канадада ўтказилган тадқиқотда камида уч нафар дўсти бўлган инсонлар таниш-билишлари камроқ бўлганларга қараганда ўзларини бахтлироқ ҳис этиши исботланди. Дўстлик саломатликка яхши таъсир кўрсатади ва умрни узайтиради.
5. Жамоавий машғулотларда ўзингизни синаб кўринг
Жамоада ўз ўрнини топиб яшаш завқи ўзгача. Бунинг учун қизиқишларга қараб, якдил фикрли инсонларга яқинроқ бўлиш керак.
Натижа қандай бўлади?
Жисмоний ва психологик соғлиқ сингари ижтимоий саломатлик ҳам доимий ҳаракатни талаб этади. Тавсияларимизга амал қилиб кўринг, натижасини ўзингиз кўрасиз.
Манба: https://www.psychologies.ru
