Бир қарашда Одина (исми ўзгартирилган) ҳамма қатори оддий аёл, аммо орқасида ўзга юртда салкам қулликда яшаш, ватанга қайтиш ва оғир психологик травма ҳақида даҳшатли ҳикоя бор.
Одинанинг оиласида доимо етишмовчилик бўлган, ваҳоланки у кўп меҳнат қиларди. 2022 йилда у самарқандлик Самира билан танишиб, у эса Малайзияда сартарошлик қилишни таклиф қилди. Одина ўз соҳасининг яхши мутахассиси бўлиб, чипта учун пул йиғишни бошлади. Унга катта даромад ваъда қилишди. У пулни тежаб, уйга қайтганда уй сотиб олишни орзу қиларди. Самира унга виза олишга ёрдам берди ва уни аэропортда кутиб олишларини ҳамда кейинги келишувларда ёрдам беришларини айтди.
Қизни Куала-Лумпур аэропортида Самиранинг акаси кутиб олди ва бир аёлнинг уйига олиб борди. У аёл эса иш визасини расмийлаштириш учун Одинадан паспортини сўрайди. Қиз унга ҳужжатларни беради. Шу билан унга паспортини қайтаришмади, унинг саволларига эса ҳужжатлари элчихонада эканини айтишди. Одина Самиранинг акасини бошқа кўрмади, Самира билан ҳам боғлана олмади.
Уй эгаси Одинага виза олгунча турар жой учун пул тўлаш кераклиги, бунинг учун эса ишлаши кераклигини айтди. Одинага фоҳишахонада ишлашни таклиф қилишди, у даҳшатга тушиб, элчихонага бормоқчи бўлди, лекин уй эгаси бўлмиш аёл элчихонада ўз одамлари борлигини, агар Одина айтганини қилса, уйига қайта олишини айтиб қўрқитди. Қиз ҳаммасига кўнди.
Одинанинг айтишича, фоҳишахонада ўзидан ташқари Яқин Шарқдан кўплаб аёллар ишлаган. Малайзия қонунлар жуда қаттиқ ишлайди, фоҳишахоналар тез-тез ёпилиб, қизлар кўчаларни айланиб, мижозларни ўзлари топиши керак эди. Одина кўчага чиқарди, лекин мижозларни қидирмасди, шунчаки қўшмачи аёлга мижоз топа олмаётганини айтарди. Шунда қўшмачи у билан бирга чиқа бошлади. Одина қочишга уринди, лекин виза ва чипталар учун пулни ишлаб қайтариши кераклиги, салкам 6000 доллар қарз эканлигини айтиб, уни фоҳишахонага қайтаришди.
Одина озроқ пул ишлаб, уйига жўнатмоқчи бўлганида фоҳишахона эгаси билан ўрталарида низо келиб чиқади. Аёл полиция чақириб, қизни ўғирликда айблайди ва унга топширган хонада фоҳишалик билан шуғулланнаётганини айтиб арз қилади.
Полиция Одинани қўлга олди, уни фоҳишаликда айблашади, аммо Ўзбекистон Ташқи ишлар вазирлиги ва Малайзиядаги консуллик кўмагида у тез орада ўз ватанига депортация қилинади. Ўзбекистонда эса аллақачон Одина ва бошқа ўзбек аёлларини Малайзияда мажбуран ушлаб турган ва одам савдосига кўмаклашганларга нисбатан жиноий иш қўзғатилган эди. Яна 15 нафар қиз ватанига қайтарилди.
Бухородаги «Ойдин нур» шелтерига Одинани терговчи йўналтиради. Қизнинг борадиган жойи йўқ эди, оила аъзолари уни қабул қилишмади.
“Ойдин Нур”да Одинага психологик ва ижтимоий ёрдам кўрсатилди. Фарзандини мактабга жойлаштиришга кўмак берилди, шунингдек унга ҳуқуқий ёрдам ҳам берилди. Шелтер юристлари Одина расман одам савдоси қурбони сифатида тан олингани учун унга давлат уйини олишга ёрдам беришга ҳаракат қилишди.
Аммо Одина шелтерда узоқ қолмайди, 2 ҳафтадан кейин у турмушга чиқади (интернет орқали танишган бўлажак эри ЗАГС ни тезлаштириш учун ҳомиладорлиги ҳақидаги ҳужжатларни қалбакилаштиради). Аммо маълум бўлишича, эркак анчадан бери бошқа аёл билан яшаган, Одинани мунтазам калтаклаб, пулини тасарруф қилишга рухсат бермасди. Эр-хотин 2022 йилнинг апрелидан 2023 йилнинг декабригача шу тарзда яшаган.
2023 йил охирида Одина ажрашишга қарор қилди ва «Ойдин Нур»га қайтди. Бошпана ходимлари яна аёл билан психологик иш бошладилар. Одина ҳам одам савдоси, ҳам оилавий зўравонликдан жабр кўргани учун анча рухан синган эди. У янги ҳаёт бошлашни, салонда сартарош бўлиб ишлашни ва давлатдан уй олишни хоҳларди. Фарзанди билан тинч яшаш унинг ягона орзуси эди.
Аммо оғир рухий жароҳат ва жамият босими унга ўз хоҳишига қарши боришга мажбур қилди. Шелтер ходимларининг сўзларига қарамай, Одина яна эрининг олдига қайтди. У ҳақида ҳеч нарса маълум эмас. “Ойдин Нур”дагилар нима бўлишидан қатъи назар, аёл қайтиб ёрдам сўраса, уни яна кутиб олишга тайёр эканликларини айтишди…
Нигина Худайбергенова
